Sambrama Wacana

Sambrama Wacana Wanti Warsa STT. Sila Kumara

"Om Swastyastu"

Sadurung titiang nglanturang atur pinih riin ngiring dumun sareng-sareng ngaturang puja pangastuti majeng ring Ida Sang Hyang Widhi Wasa, mogi-mogi sangkaning paswecan Ida parikrama rahinane mangkin prasida mamargi antar tan kapialang.

-    Mantuka ring para manggala praja makadi Bapak Prabekel, Bapak Klian Dinas utawi sane ngangganin dane sane wangiang titiang.

-    Para manggala desa makadi Bapak Bendesa Adat miwah Prajuru Adat sane baktinin titiang.

-    Bapak Kelian Adat Banjar sane kusumayang titiang.

-     Para Kelian Truna Truni sinamian sawewengkon Desa Adat Sila  Dharma sane suksmayang  titiang.

-    Para truna truni Sila Kumara Banjar Batan Nyuh sane tresna asihin titiang

Kaping ajeng titiang ngaturang suksmaning manah ring sapengrauh ida dane para manggala taler para sameton sinamian, sane sampun prama ledang nodia pakaryan titiang sajeroning wanti warsa sane kaping dasa Sekaa Truna Truni Sila Kumara Banjar Batan Nyuh rahinane mangkin.

Kaping kalih titiang nenten lali nunas geng renapangampura santukan sampun janten makeh makekirangnyane inggihan indik genah, panyanggra, panamyu miwah sane lianan santukan doh wiakti, tan prasida nagingin sakadi pangarsan ida dane.

Salanturnyane atur uningayang titiang ring ida dane makasami, sajeroning nyanggra wanti warsa sane kaping dasa puniki kadagingin antuk makudang-kudang pacentokan, minakadi gotong royong kebersihan lingkungan, taler kajangkepin antuk ngaturang punia amatra ring panti werda majeng ring anak lingsir sane patut polih uratian iraga sareng sami.

Mungguing prabea sane kaanggen nyanggra acara wanti warsa rahinane mangkin wantah saking urunan miwah kas sekaa truna truni, katambahin antuk paica lascarya saking krama Banjar Batan Nyuh. Mangda taler kauningin, sekaa truna truni sane iring titiang natak panes tis ring sawewengkon banjar iriki akehnyane karobelah diri, lanang satus diri lan istri seket diri.

Salanturnyane titiang makesami iriki nunas mangda sueca Bapak Prabekel pinaka manggala praja ngicenin tuntunan, pawisik, pawarah-warah, mangda prasida titiang iriki salung-lung sabayantaka paras-paros sarpanaya, tur sida ngulati sane mawasta "matuha, migasa, mawerdya" sayan duur yusane, sayan urati miwah gelitik tur prasida sayan limbak ring sajeroning sekancan utsaha. Taler jagi aturin titiang Bapak Prabekel jagi motong tumpeng pinaka cihna acara wanti warsa Sekaa Truna Truni Sila Kumara  Banjar Batan Nyuh sampun mamargi.

Titiang pinaka prawartaka wanti warsa ngaturang suksmaning manah antuk uratian ida dane para sameton sinamian taler nenten lali titiang nunas gengrena pangampura antuk makekirangannyane.

"Om Santhi, Santhi, Santhi Om"