Sambrama Wacana

Tetuwek Sambrama Wacana

            Sambrama wacana inggih punika tata cara ngawedarang daging pikayunan ring ajeng anak lian anggen ngicenin panyanggra utawi panyambutan ngenenin indik kahanan sane wenten ri tepengan punika. Sambrama wacana lumrahnyane kabaktayang olih sang sane sampun polih kepercayaan utawi sane kajudi antuk ngangganin ngicenin pabesen ring sajeroning karya sane jagi kalaksanayang tur nganggen galah sane majangka (waktu singkat).

Struktur Sambrama Wacana

1.      Pamahbah, madaging salam pembuka, angayu bagia, lan ngaturang suksma

2.      Daging, sane katalatarang wantah unteng sane jagi anggen bebaosan

3.      Pamuput, madaging nunas gengrena sinampura lan salam penutup

Sane patut uratiang rikala mirengang Sambrama Wacana

           Ring sajeroning mirengang sambrama wacana nenten dados magegonjakan (bercanda), sumangdane sang sane mirengang tatas uning indik napi sane kapirengang. Wenten makudang-kudang baos sane patut kauratiang rikala miring anak sane maktayang sambrama wacana, inggih punika: lafal, intonasi, gerak, mimik, jeda lan penghayatan. Punika patut pisan iraga uratiang, mawinan saking lafal, intonasi, lan jeda iraga uning sapunapi sang sane maktayang punika uning tur ngaresepang daging sambrama wacana sane kabaktayang. Ring sor puniki jagi katelatarang indik pah-pahan punika.

1.   Pelafalan, wantah bebaosan kruna sane tepat tur jelas (Pengucapan kata dengan tepat dan jelas).

2.  Intonasi, marupa tinggi rendah labuh suara utawi nada sane kaanggen maktayang sambrama wacana.

3.   Penghayatan, madue artos pemahaman saking daging sambutan sane kabaktayang.

4. Jeda, kaanggen antuk ngambil nafas, nanging ngambil nafas puniki patut kaatur nganutin daging sambrama sane kabaktayang mangda nenten gegeson utawi lintang alon, lan napi tetujone sane kabaktayang mangda karesepang taler olih sang sane mireng.

5. Ekspresi, pinaka cara anggen mabebaosan antuk ngadukung napi sane iraga baktayang mangda nganutin visualisasi artos sane jagi iraga baktayang. Ekspresi dados saking gerak tubuh utawi wiraga taler dados ekspresi punika nganutin ekspresi wajah(mimik) utawi semita. Sakadi rasa sedih, bagia, semangat, msl. Ring sajeroning wiraga bagian angga sane pinih utama wantah panyingakan.

Teknik ngicenin sambrama wacana

Wenten tatiga teknik sambrama wacana inggih punika:

1. Metode menghafal, pinaka naskah sambrama sane sampun kasiapang utawi kadabdabang sadurungnyane nenten anggen kawacen nanging patut kahafalang.

2.   Metode spontanitas, pinaka metode sane nenten nganggen persiapan utawi paridabdab naskah sane kasurat sadurungnyane (bersifat dadakan).

3.   Metode nganggen ringkasan, pinaka metode sambrama sane nganggen ringkesan alit sane madaging unteng saking daging sambrama sane jagi kabaktayang.